Lokacinki Ne Amarya

Eh! lokacinki ne ya yi amarya 'yar amana

To ki je ki zauna da miji aure ibada ne

Iye! Mai zuban basira Allah da kai na fara

Na taho da koko bara nake tabara

Wakar da za na rera sai ka nufa na tsara

Zan yi ta ba gadara farin ciki amarya

Wasu sun iso ga wadansu na a hanya

Za na bude murya kira ki daura niyya

Tarkonki ya yi kamu, ko ba a so a ji mu

Tilas gari a bar mu don ga mu ga masoya

Babu ke a yau babu gantali a titi

Kin ga ke da angonki ni nake wa baiti

Ina da sahibata na kasa boye sonta

Me za na je na furta ban shawara amarya

Tunda duk abin cewa yanzu na gare ki

Me kika ji me kika yo gani a daki

Ango ya zo da harka yi mai miya ta kuka

Domin rana ta wanka ai cibi ba ya buya

Babu kyau yawan yin kace nace akalla

Yinsa a zaman tare ke haifar da illa

Yau ga wadansu dangi sun bar zuma a kungi

Haka suke da dagi yaransu na hamayya

Bar fushi yawan yinsa bai kama da ke ba

Bai kamata ki dau zuga ta 'yan uba ba

Don ba su so ki zauna shi ne na zo mu gana

Ki dauki duk batuna mai kinku zai ji kunya

In batu na sone kowa akwai gwaninsa

Wassu sun bi waina wadansu sai gurasa

Ke dai kin kama naki, ya zama mallakinki

Aiki yana gareki an so ki mai biyayya

Wasu cusa kai suke yi don a so su

Mai kamar zuwa kan aikawa da ki bar su

Ke ga wuka da nama rike ki ja ki kama

In kika yo zalama to zai fi kyau da suya

Je gaban gwaninki kawai ki yada zango

Inda dankali gobe za ki yo da rogo

A gaskiyar bayani fuskarki babu muni

Kin zarce a yi raini kin haskake alkarya

Yau da kin fito za na ce saura su koma

Kar ki fara aiki da za ki yo nadama

Wannan rana gareki ta sa ni tausayinki

Je kar ki taka birki dauko tufa ki sanya

Inda za ki je can shi ne gidan zamanki

To ki duba shuka in an zubanta taki

Zancen ga za ki auna sai ku yi zaman lumana

In kin ga wata rana yaranki za ki goya

Dan abin da yaz zo da shi taba ki lasa

Tunda ya zame ke kin zama shi ku nisa

In dai gyaran gida ne aikin da za ki yo ne

Angonki mai fita ne gurinsa tausa murya

Hudubar iyaye akanki dinga bita

Duk da mai sani ce ke baya kin karanta

Zan so ki kara himma nutsa cikin hirama

Sai ki gam asalama in kia kyauta niyya

Na taho ina gangara na rufe waka

Za na bar wasika in kuka bani fuska

Alfarma ku yi gare ni, in kun ji kun tuno ni

Ku yi addu'a gare ni kwalla ta bar kwaranya

Zunnuban da ke kai na rabbana ya yafe

Nan nake tsayawa na bar ku sai da safe