Dear Mama…

Es isch scho so, dass vill andersch isch, uf dere Wält sit du gange bisch.

Ehrlich gseit, dä ganz Planet isch en andere, sit gange bisch, will gange bisch. Verschtahsch es jetzt?

Nüt isch glich blibe.

Bisch äs Läbe lang für mich da gsi, ich wärs gern für dich wieder.

Bi i dim letschte halbe Jahr nöd vo dinere Siite gwiche.

Immer ghofft gha, es chämted besseri Ziite wieder.

Ich gseh dis Lächle no vor mir, au trotz Schmerze tüüf i dir,

immer zeigt, dass no da bisch, und dänn mit letschter Chraft is Ziel.

Nie Angscht vorem Tod gha.

Sondern ihn agnah, gschafft gha los zlah.

Ich ha die Rueh so bewundered.

Hätsch gnueg Grund gha, Wuet zha, i dene Stunde det.

Häsch gnueg lang erfahre, wases heisst undedure zgah.

Zersch dä Fruscht wäg dä Bruscht, dänn chunt unerwarted d Lunge dra. Luegi zrugg, gsehni erscht, ich ha so Glück gha.

Häsch mi immer underschtützt gha bi all mine Entscheidige,

au wänni eigentlich nöd immer gwüsst ha, wasi müsst ha.

Doch dini Art hät mr dient gha als Rückgrat,

wienes läbenslänglichs Stützrad

uf dem Weg i das Läbe, i die Wält,

wiene Reis mitme Love-Life-Ticket Hi- und Rückfahrt.

All das positive Dänke hät mr gnützt und mi gschützt gha.

Häsch mi nie ignoriert, nie gschlage, immer gliebt,

nie agressiv mit mir, nie desintressiert.

Nie trunke oder gschumpfe no mit mir.

Sondern gredt - ohni Hierachie.

Es isch scho so, dass vill andersch isch, uf dere Wält sit du gange bisch.

Ehrlich gseit, dä ganz Planet isch en andere, sit gange bisch, will gange bisch. Verschtahsch es jetzt?

Es isch scho so, dass vill andersch isch, uf dere Wält sit du gange bisch.

Ehrlich gseit, dä ganz Planet isch en andere, sit gange bisch, will gange bisch. Verschtahsch es jetzt?

I love you forever.